Staubwolgge


Home


Värs


Värs vo dr Fasnacht 2017


 


  Mit Handy App, go d Stadt erkunde,
eso hän mir die Pissoir gfunde.
Das App fiert uns durch d Wäbergass
und denn ins Roothuus, das macht Spass
Im Groossrootsaal do kasch es gniesse,
und hundert Pokemon abschiesse.


Liebi Fraue ich sprichs jetzt aa,
hän dir au scho Harndrang ghaa?
Denn vor em WC Zyt verdriibe
dänzle, hüpfe, Uffrächt bliibe
Drum hän die Fraue, denn nach Stunde,
eso dr Riverdance erfunde.
 
 
Studie saage, doo bisch perplex,
d Basler die hän sehr viel Sex.
Doppelt soviel wie uff em Land,
uff Tisch, im Bett und Kochhärd Rand.
Dr Sex macht Baselbieter mieh,
näb dr Frau hän die e Stall voll Kieh.


Nach neuschte Studie, es isch nit glatt,
wandere d Fraue ab in d Stadt.
Und willsch denn halt ins Bett go penne,
ligge dert scho alles Henne.
Jää ooni Frau im Bett und Heu,
gits näb de Kieh, im Stall no Säu.


S Handy lytet das het no gfäält,
s isch e Ami gsi, äär haig falsch gwäält.


Dr Morin dää het jetzt viel Zyt,
äär macht e Ussflug, nit so wyt.
Zwelf Natione sin iim begäägnet,
e Pfaarer het iin au no gsäägnet.
Äär syg nur hän mir vernoo,
vo Weil im achter Drämli koo.


Dr Trump verzellt e huffe Saich,
well s Hirni isch vom Sex ganz waich.
Bim Putin do waisch nit so rächt,
was dää macht, mit wellem Gschlächt.
Bim Erdogan was niemer wais,
dää het schyyns e lieblings Gaiss.


Hebsch e Selfie-Stägge hooch,
no laufe dir Tourischte nooch.
Kasch Foti mache vo dr Glatze,
oder dii am Rugge gratze.
Und de kasch es isch zum lache
Darmspiegelig grad sälber mache.


Luegsch fifty Shades of Grey Dail zwai,
kasch s brobiere grad dehai.
An dr Naase ummerisse
und denn no in Zeeche bisse.
Und w
illsch no Tipps vom Profi haa,
no lyytsch dr katholisch Kirche aa.


Nach dr OP grooss und prall,
e Bruscht wie ne Gymnastikball.
Bi Bruscht OP do dänggi glyy,
die mien nit Gross, nur praktisch syy.

Nach dr OP wär s dr Hit,
wenn die  fliessend Bier und Whisky git.


Am morge frieh wenn d Sunne Lacht,
dr Blocher uff e Marmor gracht.
S Nasebai kaputt, s isch schyyter,
trotzdäm schnurrt dää glyych blööd wyter.
Die Wasserlache, wär hät das dänggt,
dr Sommaruuga, hets n
ym uffs Hyysli glänggt.


Bebbisong:

Dr Zolli hett doo letschthin grad erkläärt,
d Regierig isch doch s Fuetter au nit wärt.
D Mück und dr Wääber sin jetzt uff dr Stroos,
mit em Wessls goht, dää Saich vo vorne loos.


Mir maine d Burka isch e gueti Sach,
hesch yberem  Kopf steets di aige Dach.
Eb in Strapse oder Fuudiblutt,
kasch au als Maa, mit dr Burka futt.

Doch e Bebbi dää wais, was äär kaa und was äär wett
und äär wais, wie äär sich doo, z verhalte hett.
Denn e Bebbi dää wais, was äär vo sim Basel wett,
wo s Bier, scheeni Maitli und kai Ziircher hett.


E Brätt vor em Kopf, das isch jetzt Gschicht,
Hüt hebsch dis Handy immer vor em Gsicht.
Gsesch jungi  Wyybli gstylt mit Beauty Peegel
und s ainzig ächti draa, sin d Zeecheneegel.


Au in dr Schuel dien d Lehrer jetzt probiere,
ändlich d schwiizer Kinder z Integrierre.
Die dien sich still zum Islam bekenne,
hän e Bart und dien sich Hipster nenne.

Doch e Bebbi dää wais, was äär kaa und was äär wett
und äär wais, wie äär sich doo, z verhalte hett.
Denn e Bebbi dää wais, was äär vo sim Basel wett,
wo s Bier, scheeni Maitli und kai Ziircher hett
.

Die Basler Drämli blyybe sehr viel stoo,
drum duet denn ab und zue au kains me koo.
Bis die Drämli wieder dien verkeere,
muesch d Schälledrambber, wieder ney aaleere.


Willsch in Basel mit em Taxi faare,
nimmsch e Uuber, denn kasch richtig spaare.
Wettsch e Limousine gratis haa,
denn Lüttsch dr Schuggerey in Basel aa.

Doch e Bebbi dää wais, was äär kaa und was äär wett
und äär wais, wie äär sich doo, z verhalte hett.
Denn e Bebbi dää wais, was äär vo sim Basel wett,
wo s Bier, scheeni Maitli und kai Ziircher hett.