Staubwolgge


Home


Värs


Värs vo dr Fasnacht 2006

Im Blick do het me kenne lääse,
d’Zircher syyge gscheyti Wääse.
Die hänn doch, luegsch aine aa,
e IQ vo me Grättimaa.
Uns Basler freuts es isch e Pracht,
d’Entwiggligshilf het Vortschritt gmacht
.


„Schwuuli Cowboys“ lauft jetz aa,
es freut sich ganz Amerika.
Starggi Männer tätowiert,
bugge sich ganz ungeniert.
Dää Film, dä isch jetz momentan,
dr Kinohit im Vatikan.


Stoht dr Zuubi in dr Pfanne,
gits bi jedem Match e Panne.
Mit so lange Ärm und Schaiche,
sotti är dr Ball doch braiche.
Z’Schaffhuuse uff em Tor stoots druff
„Lappi mach doch d’Auge uff“.

Dr Sabo stoht jetz uff dr Stroos,
in Röschenz isch dr Daifel los.
Drum het in Rom dr Benedikt,
sofort d’Schwyzergarde gschiggt.
Im Koch länggts nonig, är will no
dr Sabo ans Gryz nagle lo.

Sit neyschtem isch jetz Sankt Moritz,
s’Kokser-Mekka vo dr Schwyz.
Statt uff de Pischte aaberaase,
puderet sich jede d’Nase.
Aine het total bekifft,
scho an dr Schneekanone gsnifft.

S’Café Bâle das isch passé,
kaine will dä Saich me gsee.
E halb Stund duurenander schnuure,
kaini Witz me zwischeduure.
Bi däm Konzäpt fallt uns nur y,
„Felix –Platter....Geriatrie“

Dä Güggel isch no voll im Saft,
d’Hiener hänn en nonig gschaft.
S’isch kai Fuchs ko in dr Nacht,
dr Fyynstaub het em au nyt gmacht.
Au d’Vogelgrippe kasch vergässe,
dä Güggel hänn mir vorhär gfrässe.


Im Bundeshuus in Bärn sit neyschtem
s’blutti Chaos herrscht:
Dr Leyebärger dä sait nyt,
doch mit däm Gsicht verschreggt är d’Lyt.
Dr Schmid isch iberall presänt
und schüttlet jedem Dottel d’Händ.
Dr Couchepain allem Aaschyn aa,
liegt uns nach Strich und Faade aa.
Dr Merz dä glaini Appizäller,
frisst dr Käs mitsamt em Däller.
D’Calmy – Rey die isch zwor nätt,
hett e Profil flach wie ne Brätt.
Dr Deiss dä hoggt am Röschtigraabe,
hoffentligg gumpt är nit aabe.
Und em Blocher s’isch bekannt,
zuggds mänggmol in dr rächte Hand.
Scho so ne mängge hänn die siibe,
mit em Gschnurr in Waansinn driibe.
Mir wänn si ins Ussland gää,
doch dert will si au kaine nää.
Wie wärs denn mit dr Psychiatrie
mir sperre dert die siibe yy.
Und dr Zolli het erklärt,
die syyge s’Fueter au nit wärt.
Doch ai Lösig gits do no,
vom CIA verhafte lo.