Staubwolgge


Home


Värs


Värs vo dr Fasnacht 2001


 

Miir sin im Joggeli au go dr Baublatz gschaue,
s’isch scho genial wie die deert unde jetze baue.
Me hofft nur as sy finanziell nid öbbe bschysse,
und s’mies dr Muusfäld wiider d’Hälfti aaberysse. 

S‘sin unsri Frind uus Franggrych massehaft zue uns koo,
hän unsre Moscht in iiri Roscht Karrosse dryy g’loo.
S’maint ain vo iine: Jetzt simmer äntlig, äntlig quitt,
iir suffet unsre Wyy und unsri Auti eyre Spryt. 

D’Estricher gwinne als es isch fir uns nid neu,
das chunnt sicher vom Verzehr vo dopte Seu.
D’Schwyzer hole WM Gold, miir hän das gsee,
die fahre so verruggd, nur dangg em BSE. 

Bim Abschiid hedd dr Ogi gsait: Er müesst nid briegge,
y freu my scho is Aemmital go ummeschiegge.
Jetz äntlich ha n’y Zyt zur Pflääg vo unsrem Büüsi,
und zue mym Jodel-Training oobe z’Chuderhüüsi. 

Es duet de Ami unsre Kääs viel mieh beraite,
wäg de grosse Lecher gidds jetzt Schwierigkaite.
Doch kenntsch die Lecher an de Wahle alli zelle,
denn hätte d’Ami e Schwyzer as ihre Presi welle. 

Big Brother isch dr grossi Hit in alle Länder,
de chaschs bald nymme gsee, es lauft uff alle Sänder.
Doch muesch das Gschnurr vom Heeb im Tele Basel Gaffe,
do luegsch lieber wieder die Containeraffe. 

Dr Aernscht-Auguscht z’Monaco wo duet haimwäärts strääbe,
macht schnäll e Brunne und das schyynt’s e bizz drnäbe.
Dr typisch Wuetaafall vo iim syg nochhäär g’loffe,
will är im Suff statt d’Muure s’aige Bai hedd troffe. 

Dr Jögge Schild macht sini Arbet maischtens richtig,
das mid de Kampfhünd finde mir au zymlig wichtig.
Doch sythär dien mirMänner, s’Shoppe z’Basel hasse,
will unsri Fraue uns e Muulkorb dien verpasse. 

Dr Boris duet im TV, Internet wärbig mache,
in letschter Zyt cha är do dryyber nymme lache.
D‘ Babs lood sich scheide, macht jetzt e riese Gwinn,
denn ihr Mann war Online in der falschen drin.